A Guide on How to Stay Safe and Turn the Table Against Sexual Predators On The Internet

Arabic Version:

احب ابدأ المقال وأقول:لو كنت ولد و بتقرأ الكلام ده دلوقتي، فهي دي فرصتك الذهبية عشان تعرف البنات اللي حواليك بيتعرضوا لأيه باستمرار، دي فرصتك الذهبية عشان تنشر الوعى بين صحابك و تساعدهم يفهموا ازاي يتعاملوا مع البنات اللي حواليهم ،تعلمهم ازاي يتصرفوا مع المنتهِك الجنسى،المتحرش،او مغتصب الاطفال.
انا عارفة ان الولاد برضوا عرضة للتعدي الجنسى و الاهانة و التهديد ،و فاهمة بشاعة المشاعر اللي بيمر بيها الضحية بغض النظر عن جنسه سواء ست او راجل،و اتمنى من خالص قلبى معاقبة اي حد كان سبب فى ايذاء اى انسان تانى و يكون مصيره وراء قضبان السجون.

نرجع للموضوع الاساسى، المقال ده للبنات بالأخص. و علشان انا واعية ان اغلب متابعين مجلة ميلكى واى في سن المراهقة او الشباب،و عارفة برضوا ان الزمن اللي احنا فيه بقا زمن صعب و مقرف و مخيف علشان بقى فى حوالينا ناس تعدوا مرحلة المرض النفسى. و فى ضوء الاحداث الاخيرة بالنسبة للمتعدى الجنسى،المغتصب و المتحرش المتداول اسمه على مواقع التواصل، اكتشفت انه البنات اللي كان بيهددهم مكانوش عارفين يتصرفوا ازاي من كترالخوف و الذعر من التهديدات. انا متأكدة انه فى اللحظات ديه بيكون الوضع مرعب،و ان لو راجل فى يوم هددني انه هيدمر سمعتى هخاف و هترعب انا كمان،ولكن انا هنا النهاردة عشان أدي شوية نصائح تمنع اي متعدى جنسى من التحكم فيكي و التسلط عليكي بأى شكل من الاشكال. و ازاي تتصرفي لو كنتي فى موقف مشابه على اى من مواقع التواصل او الانترنت بشكل عام،و ازاي تقلبي الوضع لصالحك و ضد المتعديين و امثالهم.

(للتوضيح، دا المقال بيناقش التهديدات الالكترونية بس)

ازاى متسمحيش لاى شخص انه يفرض سلطته عليكِ؟

الخطوة الاولى: متخليش الحب يعميكِ عن الحقيقة.

انا واعية كامل الوعى بأن مش كل الرجاله سيئين،ولكن بعضهم كدا،فى السئ و فى الكويس. فرجاءا افهموا و كونوا واعيين ان لو فى شخص حبكم، مش هيعاملكم ابدا كمجرد(اشياء مادية). لو حبك شخص فعلا، عمره ابدا ما يطالبك بأي شئ يبدد راحتك و حريتك بالمرة، لو حبك فعلا، عمره ابدا ما هيطلب صور او مقاطع فاضحة لكِ، لانك وببساطة شديدة مش مجرد (جسد) بالنسبة له من الاساس، لو حبك شخص بصدق فهو حتما هيقع فى حب روحك و شخصيتك و طريقة تفكيرك. جسمك و مظهرك الخارجى بشكل عام مش هيمثل اى اهمية له. انا عارفة ان الخطوات الاولى فى العالم النسائى مش سهلة، عارفة ازاى اختلفت الاشياء و المناظير و المقاييس من عامى الحادى عشر الى عامى الرابع عشر،لأنني كنت هناك فعلا،و خضت التجربة دى بنفسى، عارفة انك عايزة تحسي انك محبوبة و غيرها من المتطلبات الطبيعية للسن دى،ولكن رجاءا افهمى ان دا مش اهم حاجة فى حياتك،وانه مش مهم على المدى البعيد من الاساس.

لو اى راجل حاول انه يقلل من راحتك، ارجوكى متفكريش فى الموضوع مرتين قبل ما تمحيه من حياتك نهائيا،هو مش هيضيف لها مقدار ذرة بالقدر اللى هياخده منها. هو مش بيحبك اطلاقا زى ما انتِ فاكرة ،هو بس بيستخدمك لارضاء شهواته الشخصية فقط لا غير.
و انا فعلا آسفة لاضطرارك انك تتعاملى مع الكائنات اللي زيه.

الخطوة الثانية: ما تبعتيش اى محتوى فاضح لك

(nudes) عارفة ان فيه ناس هتعتبر ده تشدد و الجو ده،ولكن انا حقيقى مش مهتمة بآراء زى دى. متبعتيش صور فاضحة ليكى، هكررها تانى،متبعتيش اى صور فاضحة ليكى ارجوكى. لو طلب راجل منك صور فاضحة لك فممكن ان اوعدك بنسبة ٩٠٪؜ انها مش هتقف عنده هو بس،دى هتكون لاصحابه و اصحاب اصحابه و اصحابهم كمان،والدورة دى مش هتخلص، وخلينا نفترض ان ده مش هيحصل،ليه تحطى نفسك فى خطر زى دا ولو بنسبة ١٠٪؜ حتى؟ ليه تخلى حاجة زى كدا مدة لذتها متتعداش التلت دقايق باحتمال وجود احتمالية تنايج سلبية مروعة على راحتك و امانك الشخصى بقية حياتك؟ايه اللى مخليكى متأكدة ان اللي مرتبطة بيه دلوقتى هيدوم للابد؟ الانتقام الاباحى دا شئ حقيقى و موجود، فى حرفيا مجموعات على مواقع التواصل الاجتماعى هدفها الاساسى هو نشر محتويات فاضحة وصور عارية للبنات فقط لا غير. وثقى فيا انتِ مش عايزة تتعملى مع ناس زى دى و مع ابتزازهم ليكي. ارجوكِ اختارى القرار الصائب الواعى و متعمليش كدا.

الخطوة التالتة : خليكي واثقة في احساسك..

حاجة مهمة جدا انك متقعيش تحت اي ضغط.. لو حاسة انك مش مرتاحة لاي حاجة متعمليهاش. مفيش حد ليه الحق انه يقنعك لحاجة تانية. لو مش عايزة تروحي الحفلة دي او تخرجي مع الولد المريب ده او تشربي الي هما مقدمينه ليكي متوافقيش. احساسك دايما بيكون صح و لما بتبقي في خطر هتحسي بده. تجنبي الصحاب الي بيحسسوكي انك محتاجة تبقي متفتحة اكتر او انك بتتصنعي انك كويسة لمجرد انك بترفضي الي بيعرضوه عليكي.. الصحاب الحقيقية هم الي هيقبلوكي زي ما انتي و هيهتموا انهم يبعدوكي عن اي خطر. تاني, امسحيهم من حياتك و اختاري راحتك و امانك فوق كل حاجة.

طيب نعمل ايه لو بنتعرض للتهديد و ازاي نستخدمه لصالحنا؟

هنا ازاي تتعاملي مع اي واحد مقرف لو قرر يهددك من النت..
خليكي عارفة و فاهمة ان الانسان ده مريض و انها تهدديات عالفاضي. هو بس بيحاول يلوي دراعك و يتسغلك زي ما هو عايز.. متخليهوش يكسب!

  1. خلي اهلك و دايرتك يعرفوا الي بيحصل, عشان حتي لو قرر يتكلم يتهاجم ساعتها.
  2. خلي عندك كل ال screenshots كدليل علي اي حاجة بيقولها و سجلي المكالمات بينكم لو تعرفي.
  3. اعمليله بلوك من كل موقع يقدر يوصلك منه من غير ما تسيبي اي منفذ يوصلك منه.
  4. بلغي مباحث الانترنت و أؤكدلك انهم هيهتموا بالموضوع ده كويس اوي. لو تقدري تبدأي حملة ضده و تفضحيه متتأخريش. هحيكي علي ده جدا و شجاعتك.
  5. اليكي الارقام الي تقدري تتواصلي معاها :
    1) الخط الساخن لشكوي المرأة : 151155
    2) إدارة مكافحة جرائم الحاسبات: 108
    3) وحدة مكافحة العنف ضد النساء: \333\444\01126977222
    4) مساعدة قانونية: 01210009192

يا بنات ارجوكم متسمحوش لاي حد في العالم انه يمارس عليكم اي نوع من انواع القهر او الظلم. المرضي الجنسيين و المتحرشين لازم يتحطوا في السجن. هم مكانهم هناك و احنا هنتأكد انهم في مكانهم الصحيح الي بينتموا ليه.. احنا واقفين سوا كلنا متخافوش ابدا من نشر قصتكم. المغتصب و المتحرش و مغتصبي الاطفال هيتجابوا و هنقضي عليهم هم و اي حد بيعمل افعال مشابهة . اتمني اننا نشوف اليوم الي مش هحتاج اكتب فيه المقال ده عشان نعلم بناتنا الصغيرة ازاي يحموا نفسهم. يا رب يجي الوقت الي الاهالي هيعرفوا ازاي يربوا عيالهم و يعلموهم ازاي يحترموا النساء….

Pages: 1 2